FAAGEBARKIJI RAERIEH

Ij leah badth naan skïemtjelasse gosse irhkesovveme. Seamma aejkien jeenjesh gïeh buerie viehkiem åadtjoeh aarkebeajjetje jieliemisnie bearkanidh gosse boelhkem psykolåågen jallh psykiateren luvnie minnieh. Ij leah ov-sïejhme jallh rovnege jis hajnarostoe easkah guhkiem mænngan dah irhkemh lin. Maahta viehkine faastedåaktarinie jallh voelpigujmie soptsestidh. Barre datne dïhte gie damth mah psykolåågen viehkiem daarpesjeminie jïh mah jïjtje jaahkah luvnije aevhkine. Maahta ov-murrede ovnohkens olmetjasse soptsestidh. Åvtel-bodti jeenjesh utnieh terapije nåake, men minngelen vïhtesjieh ij leah guktie vïenhteme. Psykolåågh hip barre goh jeatjah olmetjh – måedtie-leejne. Jeenjemasth dah maehtehtje pasientide jearsoe darjodh, jïh giertieh badth aaj datne aalkoevistie joe saarnoeh jis mij akt, v.g. jis saarnoeh maahtah varke måaskodh jïh dannasinie åvtel-bodti joe daarpesjh soejkesjidh jïh laktjedh guktie prosesse galka juhtedh.

Jeenjesh vuejnieh tsiehkie annetje jeatjahtåvva mænngan goh psykolåågen luvnie vaadtseme. Jeenjesh utnieh giehpebe vuejnedh guktie jïjtjemse maehtieh aelkedh gorredidh jïh guktie bööremes dåemiedidh jeatjah olmetji sisnie. Åenehks-ligke: dah jïjtjemse buerebe guarkoeh jïh dejtie damtojde mah jïjtsasse maehtieh geerve. Naa gïllesh dejstie mah boelhkem psykolåågen luvnie mïnneme gïeh demtieh gaajhke geerve haajpene, men jeenjesh jiehtieh sijjieh buerie vuekiem gaavneme guktie dåemiedidh dejnie mij sijjide geerve. Jis ij leah arna psykolåågen luvnie mïnnedh dle maahta badth aaj soptsestallemedåehkesne meatan jallh oktegs soptsestimmiefaaleldahkem åadtjodh irhkeldh olmetji gaavhtan, v.g. ADAM:ste gusnie manne barkem jallh jeatjah dåarjoejarngeste lïhketjisnie. Gumhtie vuajnah dle raerieh gååvnesieh. Mov bööremes raerie dutnjan ahte jïjtje goevlh jïh gaavnh mij dutnjan bööremes.

Lennart Persson tjeeli, hearra, ADAM støtte- og samtaletilbud for menn / adam@kirkens-ressurssenter.no

Jis psykolåågeviehkiem daarpesjh dellie hijven aalkove faastedåaktarinie soptsestidh. Faastedåaktere maahta datnem raajedh psykiatrijeske poliklinihkese gusnie dah vierhtiedellieh mah desnie naan faaleldahke mij dutnjan sjeahta. Vihkele ahte dåaktere tjimkes-ligke maahta buerkiestidh maam datne daarpesjh. Dåakterasse daerpies mïeledh datne seksuelleligke irhkesovveme, jïh magkeres vaejvieh dov mejgujmie tjabreminie.

Daamtaj numhtie dah gaertjiedamme man guhkiem poliklinihken faaleldahke ryöhkoe jïh jeenjen aejkien olmetje tjeahta naa geerve jis faaleldahkem åadtjodh gænnah. Jis eensi terapijem daarpesje guhkeben aejkien dle daamtaj datnem stillieh govlehtidh privaate psykolåågespesialistine jallh psykiaterinie. Muvhth privaate spesialisth tjïeltine laktjeme, dellie barre jïjtjedh åesiem maaksah gåessie sïejhme åasehts-leahpam åadtjoeh. Jeatjebi luvnie tjoerh abpe åasam maeksedh mij maahta 750-900 kr. tæjmosne. Tjoerh jïjtje psykolåågespesialistine/ psykiaterinie govlehtidh mah dutnjan sijjie gååvnese. Faastedåaktere galka læstam utnedh mesnie tjåådtje mej privaate spesialisti lea sijjie jïh astoe dåastoehtidh, daate læstoe dovne gaskeviermesne. Jis læhkam atnah, dellie faastedåaktere meala mejtie dennie læstosne akte gïen sjïere daajroeh irhkemegyhtjelassi muhteste. Aerviedimmesne maahta guhkies vuerteme.

Gellie irhkeldh olmetjh traumasåjhtoste stoere aevhkiem åådtjeme gosse leah måedtieh våhkoeh skïemtjegåetien goevtesasse tjaaleldahkesne. Sujhtemevuekie jeatjah-leejne sijjeste måbpan, jïh gellien aejkien dovne dåehkie- jïh oktegs-såjhtoe dïhte. Naemhtemes goevtesisnie åadtjodh årrodh, dle dåaktere jallh psykolååge ohtsemem tjaala.

Lennart Persson tjeeli, hearra, ADAM støtte- og samtaletilbud for menn / adam@kirkens-ressurssenter.no

Byöroe dan man aelhkie faastedåaktarinie irhkemi bïjre soptsestidh. Lïjhke gujht jeenjesh guhkiem guaktastalleminie mah gelkieh doestedh viehkien mietie gihtjedh, gosse ij mïelh gan mij galka dellie sjïdtedh. Daajroes ahte dovne jaahkoe jïh hijven govlesadteme daerpies jis olmetjasse galka hijven domtedh soptsestidh. Muvhtene eah dåakterh gih reakta mïelh guktie dååpedidh daagkeres aamhtesigujmie. Eah gaajhkesh vuertieminie alma galka soptsestidh dan lea geerve juktie seksuelleligke irhkesovveme. Muvhti dåakteri ij leah irhkemi bïjre nuekies maahtoe jïh destie dam eah daejrieh. Luvnije hijven jis dåaktere dïhte gie luvnije daagkerem soptsestimmie-aamhtesem buakteme. Aervedem ij leah sån badth naemhtie. Maahta pasientese ov-murrede juktie satne dïhte gie tjuara aelkedh, men jis åvtel-bodti joe aervede dåaktere viehkiem daarpesje dle kaanne giehpebe. Dåaktarasse maahtah dovne jiehtedh: “daelie joekoen vihkele munnjan datne vietjeles-ligke soptsesth jïh veele goltelh guktie maehtien hijven-ligke soptsestalledh”. Mujhtieh badth aaj, datne dïhte gie bööremes daajrah guktie leah jielieminie. Jis læhkam atnah, dellie faastedåakteren nuekies maahtoe jïh ïedtje dejtie dov vaejvide digkiedidh. Dagkeres dåaktere mahta hijven dåarjoelæjja, jïh buerebe badth pryövedh mah sjeahta. Dåakteri sjeavehts-dïedte, jïh aalkoevistie dåaktere kaanne aajne olmetje giejnie doesth soptsestidh dan bïjre. Oktegh goedtehtjidh dam man bïjre ij maehtieh gïese gih saarnodh, barre dïhte alvas lyövlehke. Faastedåaktere aaj maahta viehkiehtidh jeatjah raerieh gaavnedh jis sïjhth. Dåakteren luvnie eah leah dah gaavnesjimmieh man guhkiem. Buerebe dongkemisnie joe jiehtedh lissie-aejkiem daarpesjh.

Lennart Persson tjeeli, hearra, ADAM støtte- og samtaletilbud for menn / adam@kirkens-ressurssenter.no

Ahte dïhte guhte irhkesovveme jïjtje irhkedæjjine sjædta ij leah saatnan, jïh båata sån destie olmetje aerkie jïh ij gænnah daejrieh. Sïejhme ahte irhkeldh olmetje damta dah irhkemh barre goh satnem “mearhkesjamme”. Maahta sutnjan domtedh barre goh jeenje mij sov sisnie marhkeldahkesne. Vihkele vuejnedh daate lea dovne guktie olmetjasse domtoe jïh guktie maaje lea. Måadtesh bïlleminie sijjieh gïeh irhkesovveme, jïjtjh irhkedæjjine aaj sjidtieh. Daam muvhth gåhtjoeh: “vampyrsyndromine”: dam gïem “vampyre” irhkie jïh “gaektjeste” dïhte jïjtje aaj jeatjebem irhkie juktie daate barre goh åesie skaarijste. Olmetje maahta jïjtse raastijste bïlledh jïh/ jallh maam jeatjebh sov bïjre ussjedieh. Dïhte muvhtide dorje ahte lyövlehke domtoe jïjtse maanah geehtedh jallh jeatjah maanajgujmie tjåenghkesne vuajnalgidh. Daate aaj maahta satnem heerredh viehkie-ohtsemistie juktie bælla olmetjh dellie maehtieh satnem irhkedæjjine jaehkedh.

Vihkele badth nænnoestidh ij leah daate saatnan. Ij leah mestie gih åvtese båateme dïhte gie irhkesovveme jïjtje irhkedæjjine sjædta. Låhkoeh gååvnesieh mah vuesiehtieh jeenjesh gïeh mubpieh irhkieh, jïjtjh leah irhkesovveme. Men mubpelen ij maehtieh daejtie låhkojde guarkedh gænnah jïh jiehtedh guhte lea irhkemem dååjrehtamme, jïjtje aaj mubpieh jis irhkie. Jeanatjommes dejstie mah irhkesovveme, eah mubpieh irhkh. Vååjnoe vielie goh dah mah daagkerem nåakem gïerteme sijhtieh mubpide dåarjodh jïh viehkiehtidh.

Damtoeh jïh bælloe maehtieh naskoehtidh ihkie dah barre veanhtoste vualkeme. Jis dov mïelen mietie geerve daejstie assjaldahkijste bïesedh dle maahta viehkine giejnie akt soptsestidh dan bïjre. Ih edtjh gujht ussjedidh tjoerh maanijste dabpanidh. Dah hip boerehks stoere-olmetjh jïjtsh bïjre daarpesjieh mah lïhketjisnie jïh maehtieh dejtie vaarjelidh.

Lennart Persson tjeeli, hearra, ADAM støtte- og samtaletilbud for menn / adam@kirkens-ressurssenter.no

Jeenjesh mah irhkesovveme demtieh sijjieh annje goh irhkedæjjan faamoen nuelesne, maaje guhkiem mænngan goh dah irhkemh aaj nahkin. Irhkeldh olmetjasse maahta daerpies åadtjodh guktie akt reakta galhkedh daejnie, jarkelidh jïh jamhkelidh dan irhkedæjjan faamoem. Skaltam bïejedh dan olmetjasse gïese galka, jïjtsasse jïh irhkedæjjese vuesiehtidh satne jeatjah olmetje daanbien goh dillie, jallh jeatjebe aaj. Gellien aejkien lea vaajtelimmie irhkedæjja galka itjmiem guarkedh jïh aanteges birredh.

Ij irhkedæjja gaajhken aejkien dåemedh guktie åvtel-bodti vaajtelamme. Irhkedæjja muvhtene maahta garvehtjidh daejtie aamhtesidie jïh jeatjah-leejnes buerkiestimmieh buektedh jallh altese dïedten nueleste pryövedh bïesedh. Daate giehpebe jåhta jis datne ryöjredamme daase, jïh jis dov tjïelke ulmie daejnie, guktie gaavnesjimmie jeenjemes dov syjhteden mietie sjïehtelåvva. Jis ij, dle varke maahtah dovletje irhkeme-mojhtesi sïjse baetsedh, ih destie buektehth vielie soptsestallemem stuvrehtidh. Tjuara guktie akt geekteleejnes damtoejgujmie maehtedh, eeremes gosse incesten bïjre daate, juktie olmetje dan tjarke veadtaldihkie dan maanese mij lij dillie. Ussjedh maam sïjhth edtja daestie sjïdtedh. V.g. irhkedæjjam åadtjodh jååhkesjidh jallh nænnoestidh dam dov soptsesem, njaalmeh- jallh tjaaleldh aanteges dutnjan jïh/ jallh dov lïhkesadtjide vedtedh, dåajvoehtidh galka meahtjamidh dejstie sijjijste gusnie måedtien aejkien sååjhteden gaavnesjidh, jallh jeatjebe aaj.

Gaavnesjimmie man naemhtemes ulmie, maahta hijven vuekie skaltam bïejedh jïh jïjtje guhkiebasse bïesedh. Maahtah dån mænngan damtedh ektievoete dotnen irhkedæjjan gaskem jorkeståvva jïh damtoej muhteste stuerebe gaske sjædta. Numhtie irhkedæjjam nehkele “kraehpien sistie olkese”. Muvhth jis utnieh seamma gosse irhkedæjjam bæjhkohte. Geerve mïeledh mij dutnjan bööremes sjeahta bielelen dov soptsestimmiem. Maahtah mannine govlehtidh digkiedidh jallh jeatjabinie naan dåarjoejarngeste dov lïhkes byjreskistie. Daamtaj hijven ij leah oktegh jis galka konfronteeredh jïh gaavnesjidh dejnie gie datnem irhkeme.

Lennart Persson tjeeli, hearra, ADAM støtte- og samtaletilbud for menn / adam@kirkens-ressurssenter.no

Buerie raerie lea advokaatem birredh vierhtiedalledh mah aamhtese galka bæjhkoehtovvedh vuj ij. Seksuelle irhkeldh olmetjen gujht reakta åadtjodh golmen tæjmoen åasehts advokaateviehkiem, maam dah raeriestieh nuhtjedh daan vierhtiedallemasse.

Guktie galka bæjhkoehtidh?

Seksuelle irhkemidie bæjhkohte dan politijekammerasse jallh lientsiekontovrese mïsse jïjtje sæjhta. Raeriej mietie galka advokaate datnem åajvahtidh jïh dïhte dovne vierhtiedalla mah aamhtese byöroe bæjhkoehtovvedh vuj ij. Advokaate maahta dan irhkeldh olmetjasse viehkiem faaledh, dellie advokaatekontovrebarkijem minngesne åadtjoeh gosse vualkah bæjhkoehtidh. Jis sïjhth maahtah jeatjah olmetjem meatan vaeltedh gïem jïjtje veeljh jïh gïese buerebe jaahkah.

Gåessie aamhtese båarastovveme?

Daate geerve gyhtjelasse vaestiedidh dïsse gie ij lea faagebarkije. Daan aamhtesen muvhth åejvienjoelkedassh jïh (daaroen) muvhth “unntak”. Raeriej mietie dle galka voestes aejkien joe advokaaten luvnie dan bïjre raada-guedtedh, gosse vierhtiedallemem åadtjoeh mejtie byöroe aamhtesem bæjhkoehtidh vuj ij.

Maam dle darjoeh jis dov aamhtese båarastovveme?

Raeriej mietie dle bööremes ahte advokaate dïhte gie viehkehte naemhtemes raerieh vedtedh jïh gie dam vierhtiedalla. Jeenjh badth nuepieh mejtie tjuara juridihkeles-ligke vierhtiedalledh mah dah bööremes dutnjan jïh maam dam datne sïjhth jaksedh.

Guktie buerie advokaatem gaavnh?

Maahtah goevledh daennie nehtesæjrosne: www.advokatenhjelperdeg.no/Rad_og_tips/ gosse viehkie-advokaatem daarpesjh. Desnie måedtieh bïevnesh gaavnh. Jeatjah nuepie lea ringkedh naan dåarjoejarngese incesten jïh seksuelle irhkemi vuestie, mij lïhke dagka gåabph edtjh mïnnedh bæjhkoehtidh. Desnie maahtah gihtjedh mah naan nuhtjijh jïjtsh viehkie-advokaatide nommehtamme giejgujmie fuakeme. Juridihkeles bïevnesh, dovne seksuelle irhkemi bïjre jïh maaksoej bïjre seksuelle irhkemi mænngan, daesnie gaavnh: www.fmso.no/sider/tekst.asp?side=93. Desnie artihkelem gaavnh maam advokaate Thomas Benestad, Advokatfirmaet Salomon Johansen AS dorjeme jïh redigeereme. Desnie jeenjh bïevnesh jïh svaalhtesh.

Endre Førland tjeeli, faage-åvtehke, Senteret for seksuelt misbrukte menn. post@ssmm.no

SSMM Sentret for seksuelt misbrukte menn

Måedtieh leevles damtoeh gosse ussjedeminie mah galka gïese gænnah saarnodh dej seksuelle irhkemi bïjre. Dan åvteste ij leah goh seamma gaajhkesidie maam daarpesje åvtelen goh duasta soptsestidh. Jeenjesh jeahteme magkeres dïhte goltelæjja. Jeenjesidie joekoen vihkele goltelæjjese maehtedh jaehkedh. Dagkeres goltelæjja gie dåastohte mij jeahtelge jïh veele goltele, giejnie soptsestæjja goerkese jïh govlesadta, maahta dåarjojne dïsse. Gallesh tuhtjieh jearsoe orreme soptsestidh jïjtsh ïskeres dååjrehtsi bïjre. Ih edtjh vihth nåake domtedh, ih edtjh vihth skaamesjadtedh gåessie veeljh soptsestidh gïese akt. Maahta lyövlehke jïh gïeltege dennie prosessesne gosse jeatjabidie edtjh saarnodh datne seksuelleligke irhkesovveme. Galkh gujht maehtedh giejnie soptsestidh ollh oktegh dejtie dååjrehtsidie guedtieh.

Gosse gaajhke daate jeahtasovveme, dellie lea gumhtie jeatjah aejkiej aaj, dellie vihkele damtedh maahta gïese jaehkedh. Gosse olmetje ij oktegh domth, men mubpiejgujmie aktesne, dellie dïsse giehpebe mieriedidh edtja saarnodh. Gåarede badth naemhtemes ektievoetem damtedh måedtiej olmetjigujmie: guejmine, fuelhkine, mïelehkinie jallh jeatjah olmetjinie mij ij kaanne dan lïhkes gænnah. Jeenjesh utnieh geerve soptsestidh dan fualhkan mejnie lea byjjenamme. Aelhkebe maahta lïhkes guejmide jïh mïelehkidie soptsestidh. Dåarjoejarngesne, seksuelle irhkemi vuestie, desnie nuepie giejnie akt soptsestalledh gïen seamma dååjrehtsh. Daate maahta viehkine jïjtjedh jïjtjeviehkiestrategijem aelkiehtidh jïh guktie aelkedh daej damtoejgujmie barkedh.

Dïhte mij dan aktese nåake, maahta måbpan buerebe vuekie. Muvhth irhkeldh olmetjh såårneme goh gaavnehtin jallh guarkajin sijjieh lin seksuelleligke irhkesovveme, dle arna sjïdti jeenjesidie soptsestidh, barre goh barkoesijjesne jïh lïhkes byjreskisnie. Muvhtide daate hijven orreme. Mubpieh jis guhkiem jïermestalleme maam båetije biejjiej sijhtieh jeatjabidie juekedh. Destie jis leah veeljeme soptsestidh barre vihties olmetjidie. Muvhth jis dåarjoejarngesne mïnneme gusnie daagkerem tjeakas-ligke gïetedellieh sjeavehts-dïedtine jïh gusnie journaalh eah tjaalasovvh. Dubpene eah akth mah bïevnesh dan olmetjen bïjre vöörhkh gænnah, dagkerh goh: gie irhkesovveme jallh gie dan faaleldahken nuhtjije. Gosse nuhtjije lea galhkeme gïetedallemistie jïjtse dovletjem irhkeldh olmetjinie, dle maahta saaht gåessie jïjtse tïjjem orrijehtedh desnie. Muvhth jis damteme ij leah sijjide vielie daerpies daejtie aamhtesidie vihth bijjiebasse. Dah buektiehtieh gaajhkem dam laehpedh jïh aelkieh vihth jieledh guktie mubpieh gaarmanæjjah.

MIJ SJÆDTA JIS FUALHKAN SOPTSESTH

Ij leah goh aelhkemes aelkedh saarnodh bïjre jarkan. Måedtieh jïh joekehth fuelhkieh, ovmessie aaj guktie akten fuelhkien vuekieh jïh vierhtieh mohte mubpien. Geekteleejne aaj maahta jis jïjtse eejhtegigujmie, åabpaj- jïh vïelligujmie byjjenamme jallh jis barre dejgujmie naan ektievoete orreme. Jallh jis lea joe paarre-bieline gåetiedovveme jïh sotnese jïjtsh maanagåetie sjïdteme. Geerve gujht fualhkan saarnodh datne seksuelleligke irhkesovveme. Ij leah dellie man aelhkie mïeledh guktie dan minngelen.

Jeenje badth mij maahta dåeriedidh gosse soptseste maana- jïh noerebaelien seksuelle irhkemi nuelesne lea orreme. Gie jis dïhte irhkedæjja, maahta jeenje stuvrehtidh guktie dan irhkeldh olmetjasse sjædta jïh dovne fualhkan aaj. Måedtien aejkien daate prosesse sjædta. Fuelhkie kaanne vaane-jaahkosne jallh neavresne aalkovisnie, jïh annetje doeka aelkiestidh barkedh jïh tjabredh orre vuekiej mietie lïhkebe sinsætnan båetedh jïh goerkesidh vihth. Geerve jis irhkedæjja dovne håksoe-olmetje orreme. Måedtieh magkeres damtoeh irhkeldh olmetjen håksoe-olmetjasse. Muvhth håksoe-olmetjem gaarhta ihkie seamma olmetje lea satnem irhkeme. Muvhth jis eah buektehth jaehkedh sijjen eejhtegidie vielie, bïlleminie sijjen jïjtsh maanah aaj seamma irhkemen nualan båetieh. Muvhth antanedtieh eevre. Mubpieh jis baejieh barre guhkebe gaske årrodh. Gosse irhkedæjja ij leah fuelhkeste, dellie muvhtide fuelhkide giehpebe buektiehtidh dåarjelidh dam gie irhkesovveme.

Åvtelen daan prosessen sïjse tjaanga dle hijven mojhtesasse bïejedh ij badth maehtieh stuvrehtidh guktie jeatjebidie sjædta. Nuhtjijh soptsestamme dej gellieleejnes damtoeh båateme. Såemies fuelhkieh tjeajne rapkeme goh åådtjeme daejredh sotnen baernie irhkesovveme. Sïejhme aaj sleaktetji gaskemsh geerve sjædta. Ij leah aelhkie daejredh guktie fuelhkie jis daejnie orre saernine dåemiedidh. Guhkiem åvtelen dam tjuavta.

Eah hip gaajhkesh seammaligke goh gosse åadtjoeh govledh. Tjuara badth, gosse dan gåhkese båateme, doestedh jïjtse damtojde vuesiehtidh jïh ussjedidh man daerpies dutnjan soptsestidh daan bïjre. Jearsoe domtoe gosse mubpieh gïemhpes-ligke dåastoehtieh maam saarnoeh. Maahta dutnjan lyövlehke gosse jeatjabidie lyövlehke. Geerve tsiehkesne maahta vihkele sinsitniem dåarjelidh. Jis gïeh aelkieh tsællodh gaskemsh dellie vihkele maehtedh sïerredidh dov jïjtjedh jïh jeatjebi damtoeh jallh sirrieh. Daerpies dov bïjre leah olmetjh gïeh viehkiehtieh dåarjelieh jïh mah lïhketjisnie dallegh gosse dam daarpesjh. Hijven åadtjodh leevles maajsoem luejhtielidh maam dan man guhkiem guadteme.

MAAM JÅHTOSE BÏEJH JIS VEELJH SOPTSESTIDH

Jis datne oktegh, dellie viehkiem jïh dåarjoem byörh ohtsedh. Olmetje vihth jealije gosse gïem atna giejnie govlesadtedh geerve jïh leevles aejkiej jieliemisnie. Bååktjesem jïh skaamam guedtedh gosse gie gænnah datnem vuajneme, govleme jallh dåarjeme daagkeres ïskeres tsiehkesne, dïhte seamma goh oktegh narrahtimmide guedtedh. Dïhte bååktjehke. Jeenje jorkese dïsse gie skaamam åelkijste luajhta, gie mojhtele, gïetedalla jïh joekede dejtie ovtetje mojhtesidie jïh damtojde.

Juktie seksuelleligke irhkesovveme, dellie vihkele gujht jïjtsasse jearsoe sjïdtedh jïh buerie jïjtjedamtoem vihth aelkedh bigkedh. Doerelidh dejtie geerve aamhtesidie- dutnjan nuepiem vadta orre vuekiej mietie jïjtjemdh gorredidh mubpiej olmetji gaskem, jïh dutnjan aaj damtoem vadta ahte datne aaj, goh jeatjebh – mïrrestallh. Skaaman jïh skaltan damtoeh maehtieh dellie haajpanidh seammaligke goh suelnie biejjh-guakesne. Gaajhke mij irhkeme-baelien sjïdti, dïhte irhkedæjjan dïedte, ij badth dov. Dov triehpie jis daan baelien nierhkedh barkedh dejnie vaejvine mejnie tjabreminie daelie, jïh numhtie orre vuekiej mietie gaavnehtidh guktie tjuevtedh daaletje daerpiesvoeth mah dov. Maehtedh buerkiestidh gïese daej ïskeres dååjrehtsi bïjre, dïhte våaroeminie daase. Dïhte buaranimmieprosessen aalkove. Seamma mejtie naan dåarjoejarngen jïjtjeviehkieprogrammesne meatan mij seksuelle irhkemi vuestie jallh mejtie naan terapeutiske vuekiem veeljh. Jïjtsasse jaehkedh jïh jïjtjemse maehtedh viehkiehtidh galka dov reakta årrodh. Mijjide gaajhkesidie daerpies damtedh mijjieh maehtebe, buektiehtibie jïh vyörtege libie.

Ij edtjh vaarege baakoejgujmie jïjtjedh assjaldahkide jïh damtojde buerkiestidh juktie leah seksuelle irhkemem gïerteme. Vihkele åadtjodh damtedh muvhth dutnjan bööremassem sijhtieh. Galkh bïesedh soptsestidh jïh dåarjoem åadtjodh guktie jearsoe vihth domth, jïh orre vuekieh gaavnedh guktie bööremes maahtah jïjtjemdh gorredidh dov jieliemisnie.

Anders Bellemann tjeeli, SSMM baakta, Senteret for seksuelt misbrukte menn. post@ssmm.no